July 2017 | Economic News

Home » Arsip July 2017

ស្តុកប្រេងដូង ម៉ាឡេស៊ី អាចធ្លាក់ដល់កម្រិតទាប

ក្រុងគូឡាឡាំពួៈ ស្តុកប្រេងដូងនៅប្រទេសម៉ាឡេស៊ីអាចធ្លាក់ចុះមកនៅត្រឹមកម្រិតទាបបំផុតក្នុងរយៈពេល ១១ ខែកាលពីខែកុម្ភៈដោយសាររយៈពេលរាំងស្ងួតយូរដែលបង្កឡើងដោយបាតុភូតអាកាសធាតុ El Nino ខ្លាំងបំផុតក្នុងរយៈពេលជិត ២ ទសវត្សរ៍បានប៉ះពាល់ដំណាំប្រេងដូងនៅក្នុងប្រទេសផលិតប្រេងដូងច្រើនជាងគេទីពីររបស់ពិភពលោកនេះ។

ស្តុកប្រេងដូងអាចធ្លាក់ចុះ ៨,៧ ភាគរយមកនៅត្រឹម ២,១១ លានតោនធៀបនឹងខែ មករា ដែលជាកម្រិតទាបបំផុតគិតចាប់តាំងពីខែមីនាឆ្នាំ ២០១៥ មក។ នេះបើយោងតាមការព្យាករជាមធ្យមចំនួន ៨ លើកស្ថិតក្នុងការអង្កេតរបស់ទីភ្នាក់ងារព័ត៌មាន Bloomberg ទៅលើអ្នកដាំដំណាំប្រេងដូង ក្រុមឈ្មួញ និងអ្នកវិភាគ។

ទិន្នផលប្រេងដូងបានធ្លាក់ចុះ ៣,៥ ភាគរយមកនៅត្រឹម ១,០៩ លានតោនដែលជាការធ្លាក់ចុះក្នុងរយៈពេលបួនខែជាប់គ្នាមកនៅត្រឹមកម្រិតទាបបំផុតគិតចាប់តាំងពីខែមករា ឆ្នាំ ២០១១។

ការអង្កេតនេះបានបន្តឲ្យដឹងទៀតថាការនាំចេញបានធ្លាក់ចុះ ១៤ ភាគរយមកនៅត្រឹម ១,១ លានតោន។ ក្រុមប្រឹក្សាប្រេងដូងរបស់ប្រទេសម៉ាឡេស៊ីនឹងចេញផ្សាយទិន្នន័យជាផ្លូវការនៅថ្ងៃទី ១០ ខែមីនានេះ។

ក្រុមហ៊ុន Olam International Ltd ដែលជាក្រុមហ៊ុនជួញដូរទំនិញមានមូលដ្ឋាននៅប្រទេសសិង្ហបុរីបានឲ្យដឹងកាលពីសប្តាហ៍មុនថាស្តុកប្រេងដូងអាចនឹងធ្លាក់ចុះជាបន្តដោយសារផលប៉ះពាល់នៃបាតុភូតអាកាសធាតុ El Nino នឹងធ្វើឲ្យការធ្លាក់ចុះទិន្នផលប្រេងដូងមានស្ថានភាពកាន់តែធ្ងន់ធ្ងរ និងធ្វើឲ្យតម្លៃប្រេងដូងកើនឡើង។

តម្លៃប្រេងដូងក្នុងកិច្ចសន្យាអនាគតបានកើនឡើងដល់តម្លៃខ្ពស់បំផុតក្នុងរយៈពេល ១២ ខែកាលពីខែកុម្ភៈ និងបន្ទាប់មកបានបាត់បង់សន្ទុះវិញដោយសារប្រាក់រីងហ្គីតដែលមានតម្លៃខ្ពស់កាត់បន្ថយតម្រូវការរបស់អ្នកទិញ។

លោក Voon Yee Ping អ្នកវិភាគប្រចាំក្រុមហ៊ុន Kenanga Investment Bank Bhd បានបន្តឲ្យដឹងថា៖ «ផ្អែកលើនិន្នាការប្រវត្តិសាស្រ្តតម្រូវការអាចនឹងធ្លាក់ចុះក្នុងរយៈពេលខ្លី»។ លោកបានបន្តឲ្យដឹងទៀតថា៖ «តែផលិតកម្មប្រេងដូងអាចនឹងធ្លាក់ចុះរហូតដល់ខែមេសាហើយស្តុកប្រេងដូងនឹងបន្តធ្លាក់ចុះរហូតដល់ប៉ុន្មានខែខាងមុខ»។

ប្រេងដូងក្នុងកិច្ចសន្យាអនាគតសម្រាប់ចែកចាយនៅខែឧសភានៅផ្សារដេរីវ៉េទីវម៉ាឡេស៊ីមានតម្លៃ ២៥០៧ រីងហ្គីត (៦១២ ដុល្លារ) ក្នុងមួយតោននៅម៉ោងបិទការជួញដូរកាលពីថ្ងៃសុក្រ ពោលគឺធ្លាក់ចុះ ៥,៣ ភាគរយធៀបនឹងតម្លៃ ២ ៦៤៨ រីងហ្គីតកាលពីថ្ងៃទី ១៥ ខែកុម្ភៈដែលជាតម្លៃខ្ពស់បំផុតគិតចាប់តាំងពីខែមេសា ឆ្នាំ ២០១៤ មក៕ BP

ក្រុមហ៊ុន Adidas រំពឹងថាប្រាក់ចំណូល និងចំណេញនឹងកើន ១២%

ហ្វ្រេងហ្វឺតៈ Adidas ដែលជាក្រុមហ៊ុនផលិតសម្ភារកីឡាឈានមុខគេបានឲ្យដឹងកាលពីថ្ងៃព្រហស្បតិ៍ថាខ្លួនរំពឹងថាប្រាក់ចំណូល និងប្រាក់ចំណេញនៅឆ្នាំនេះនឹងកើនឡើងពី ១០ ដល់ ១២ ភាគរយដោយសារតែអតិថិជននៅក្នុងប្រទេសអាល្លឺម៉ង់បន្តកើនឡើង។

ក្រុមហ៊ុនផលិតសម្លៀកបំពាក់ និងឧបករណ៍កីឡារបស់ប្រទេសអាល្លឺម៉ង់មួយនេះបានឲ្យដឹងនៅក្នុងសេចក្ដីប្រកាសព័ត៌មានមួយថា៖ «ការលក់ត្រូវបានរំពឹងថានឹងកើនឡើងនៅក្នុងអត្រាចន្លោះពី ១០ ដល់ ១២ ភាគរយក្នុងឆ្នាំ ២០១៦ »។

ក្រុមហ៊ុនបន្តថា៖ «ការលក់ប្រកបដោយវិជ្ជមាននេះដោយសារការកើនឡើងការចំណាយរបស់អតិថិជនដែលកំពុងផ្ដល់ស្ថានភាពវិជ្ជមានសម្រាប់កំណើនដែលបន្ត និងការកើនឡើងឧស្សាហកម្មទំនិញកីឡា»។

និន្នាការលក់ដែលកើនឡើងនេះក៏ដោយសារឥទ្ធិពលពីព្រឹត្តិការណ៍កីឡាធំៗរួមមានការប្រកួតជើងឯកបាល់ទាត់ UEFA EURO ឆ្នាំ ២០១៦» និងកីឡាអូឡាំពិកនៅទីក្រុង Rio de Janeiro ប្រទេសប្រេស៊ីល។

ទាក់ទងនឹងប្រាក់ចំណូលប្រាក់ចំណេញសុទ្ធត្រូវបានព្យាករថានឹងកើនឡើងក្នុងអត្រាចន្លោះពី ១០ ដល់ ១២ ភាគរយ «ដល់ប្រហែល ៨០០ លានអឺរ៉ូ ( ៨៧០ លានដុល្លារអាមេរិក) បើធៀបនឹងកម្រិតឆ្នាំ ២០១៥ ចំនួន ៧២០ លានអឺរ៉ូ»។

ខណៈក្រុមហ៊ុន Adidas ក៏ដូចជាគូប្រកួតប្រជែង Nike ត្រូវបានរំពឹងថានឹងទទួលបានការកើនឡើងពីការប្រកួតជើងឯកបាល់ទាត់ UEFA ការទិញ និងការចំណាយលើកម្លាំងពលកម្មក៏កំពុងកើនឡើងផងដែរ។

ក៏ដូចជាក្រុមហ៊ុនផលិតសម្ភារកីឡាល្អៗផ្សេងទៀតផងដែរក្រុមហ៊ុន Adidas មានទីតាំងផលិតនៅក្នុងតំបន់អាស៊ី និងការជួញដូរជាប្រាក់ដុល្លារអាមេរិកដូច្នេះពួកគេកំពុងមានបញ្ហាប្រាក់ចំណេញដោយសារតែការកើនឡើងតម្លៃប្រាក់ដុល្លារអាមេរិកធៀបនឹងតម្លៃប្រាក់អឺរ៉ូ។

កាលពីខែមុនក្រុមហ៊ុន Adidas បានឲ្យដឹងថាខ្លួនបានប្រតិបត្តិការប្រសើរជាងការរំពឹងទុកកាលពីឆ្នាំ ២០១៥ ជាមួយនឹងការលក់កើនឡើង ១៦ ភាគរយដល់ ១៦,៩ ពាន់លានអឺរ៉ូហើយប្រាក់ចំណេញសុទ្ធកើនឡើង ១២ ភាគរយ៕ LA

ការលក់រថយន្តប្រណីតរបស់ Lamborghini កើនខ្ពស់

អ៊ីតាលីៈ ក្រុមហ៊ុនអ៊ីតាលីដែលគ្រប់គ្រងក្រុមហ៊ុន Volkswagen បានឲ្យដឹងកាលពីថ្ងៃព្រហស្បតិ៍ថា Lamborghini ជាក្រុមហ៊ុនផលិតរថយន្តរបស់អ៊ីតាលីបានបំបែកកំណត់ត្រាប្រតិបត្តិការហិរញ្ញវត្ថុរបស់ខ្លួនកាលពីឆ្នាំ ២០១៥ បន្ទាប់ពីការលក់ម៉ូដែលរថយន្តស្ព័រប្រណីតរបស់ខ្លួនបាន ៣ ២៥៤ គ្រឿងដែលមិនធ្លាប់មានពីមុនមក។

ការលក់រថយន្តម៉ូដែលបច្ចុប្បន្នពីររបស់ក្រុមហ៊ុន Lamborghini គឺម៉ូដែល Huracan និងម៉ូដែល Aventador រកបានប្រាក់ ៨៧២ លានអឺរ៉ូ ( ៩៤៩ លានដុល្លារអាមេរិក) កើនឡើង ៣៩ ភាគរយលើប្រាក់ចំណូលឆ្នាំ ២០១៤ របស់ក្រុមហ៊ុននេះ។

លោក Stephan Winkelmann អគ្គនាយកក្រុមហ៊ុនបានថ្លែងថា៖ «នៅក្នុងកំណើនរយៈពេល ៥ ឆ្នាំជាប់ៗគ្នាយើងសម្រេចបានលទ្ធផលខ្ពស់បំផុតទាក់ទងនឹងសូចនាករប្រតិបត្តិការចម្បងរបស់យើង»។

លោកបានថ្លែងដោយសំដៅដល់ផែនការរបស់ក្រុមហ៊ុន Lamborghini ដែលគ្រោងនឹងដំណើរការរថយន្ត SUV ដំបូងរបស់ខ្លួនម៉ូដែល Urus ក្នុងឆ្នាំ ២០១៨ ថា៖ «យើងបានធ្វើការសម្រេចយុទ្ធសាស្ដ្ររយៈពេលមធ្យម និងរយៈពេលវែងដែលនឹងធ្វើឲ្យក្រុមហ៊ុននេះមានសមត្ថភាពប្រកួតប្រជែងកាន់តែខ្លាំងនៅក្នុងទីផ្សាររថយន្តប្រណីតពិភពលោក»។

លោក Winkelmann ថ្លែងថាតួលេខលក់ជាវិជ្ជមានបានជំរុញការងារអភិវឌ្ឍរបស់ក្រុមហ៊ុននេះដែលរួមមានភាពខុសគ្នានៃរថយន្តស្ព័ររបស់ខ្លួនព្រមទាំងគម្រោងរថយន្ត Urus។

ក្រុមហ៊ុន Lamborghini បាននាំចេញរថយន្តម៉ូដែល Huracans ចំនួន ២ ២៤២ គ្រឿងកាលពីឆ្នាំ ២០១៥ និងបានឲ្យដឹងថាការលក់ម៉ូដែលនេះដែលបានចាប់ផ្ដើមដំណើរការកាលពីឆ្នាំ ២០១៤ មាន ៧០ ភាគរយខ្ពស់ជាងរថយន្តម៉ូដែល Gallardo ជំនាន់មុនរបស់ខ្លួនក្នុងរយៈពេល ១៨ ខែដំបូងនៅលើទីផ្សារនេះ។

ការលក់រថយន្ត Aventador ម៉ូដែលផ្សេងៗគ្នាក្នុងរយៈជាង ៤ ឆ្នាំមានចំនួនសរុប ១ ០០៣ គ្រឿង។

ក្រុមហ៊ុន Lamborghini កំពុងគ្រោងនឹងប្រើប្រាស់បុគ្គលិកបន្ថែម ៥០០ នាក់ និងបង្កើនទំហំរោងចក្រផលិតរបស់ខ្លួនពីរដងនៅក្នុងទីក្រុង Bologna ប្រទេសអ៊ីតាលីដើម្បីអាចផលិតរថយន្ត Urus បាន។

រថយន្តថ្មីនេះនឹងប្រកួតប្រជែងជាមួយ Range Rovers រថយន្ត X6 របស់ BMW និងរថយន្ត SUV ដែលបានគ្រោងរបស់ Bentley ដែលជាដៃគូប្រកួតប្រជែងរថយន្តប្រណីត។

រថយន្តនេះនឹងជាម៉ូដែលតម្លៃខ្ពស់ចុងក្រោយរបស់ Lamborghini ខណៈអ្នកជំនាញឧស្សាហកម្មរំពឹងថាមានតម្លៃប្រហែល ១៥០ ០០០ ដុល្លារបើធៀបនឹងតម្លៃអប្បបរមាបច្ចុប្បន្នរបស់ Huracan ចំនួន ២៣០ ០០០ ដុល្លារ៕ LA

ការលក់សំបុត្រចូលអង្គរនឹងត្រូវធ្វើតាមអនឡាញ

ភ្នំពេញៈ វិទ្យាស្ថានអង្គរដែលគ្រប់គ្រងដោយរដ្ឋគ្រោងបង្កើតការលក់សំបុត្រចូលទស្សនាអង្គរតាមអនឡាញដើម្បីធានាប្រសិទ្ធភាព តម្លាភាព គណនេយ្យភាព និងសេវាកាន់តែប្រសើរសម្រាប់ទេសចរបរទេសមកកម្ពុជា។

ការប្រកាសនេះធ្វើឡើងកាលពីថ្ងៃទី ១ ខែមីនានៅក្នុងការបើកវិទ្យាស្ថានអង្គរនៅខេត្តសៀមរាបដែលដឹកនាំរួមគ្នាដោយក្រសួងសេដ្ឋកិច្ច និងហិរញ្ញវត្ថុ និងក្រសួងទេសចរណ៍ដើម្បីគ្រប់គ្រងប្រាក់ចំណូលបានពីការចូលទស្សនាប្រាសាទអង្គរ។

លោក អូន ព័ន្ធមុនីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុបានថ្លែងនៅក្នុងអំឡុងពិធីប្រកាសបើកវិទ្យាស្ថានថ្មីនេះថាការលក់សំបុត្រតាមអនឡាញជាដំណោះស្រាយងាយស្រួលសម្រាប់ការលក់សំបុត្រដើម្បីធានាប្រសិទ្ធភាពគណនេយ្យភាព និងតម្លាភាព។

លោកថ្លែងថាប្រព័ន្ធព័ត៌មានវិទ្យាដែលការិយាល័យលក់សំបុត្រប្រើប្រាស់ចាប់តាំងពីឆ្នាំ ១៩៩៩ គឺមានដំណើរការយឺតហើយវាត្រូវតែរៀបចំឡើងវិញ និងធ្វើឡើងវិញដើម្បីផ្ដល់សេវាកាន់តែលឿន និងកាន់តែប្រសើរ។

លោកបន្ថែមថា៖ «ខ្ញុំគិតថាប្រព័ន្ធព័ត៌មានវិទ្យាដែលមានស្រាប់គួរតែរៀបចំឡើងវិញ និងធ្វើឡើងវិញ។ មិនមានប្រព័ន្ធកុំព្យូទ័រមេត្រឹមត្រូវនោះទេការចុះបញ្ជីគណនី និងប្រព័ន្ធទិន្នន័យសំបុត្រមិនទាន់ស៊ីគ្នានៅឡើយទេ។ យើងត្រូវតែពិនិត្យឡើងវិញអំពីលទ្ធភាពដើម្បីមានប្រព័ន្ធថ្មីមួយ»។

លោកលើកឡើងថា៖ «ការវិនិយោគនៅក្នុងប្រព័ន្ធនេះគឺមិនធំនោះទេប្រសិនបើយើងសម្លឹងមើលទៅប្រព័ន្ធដែលបង្កើតឡើងនៅក្នុងស្រុក ឬប្រព័ន្ធមូលដ្ឋាន។ ប្រព័ន្ធព័ត៌មានវិទ្យាថ្មីនេះនឹងមិនគ្រាន់តែធានាឲ្យប្រាកដពីការលក់សំបុត្រ និងប្រាក់ចំណេញនោះទេប៉ុន្តែវាគួរតែមានគេហទំព័រមួយទំនាក់ទំនងជាមួយប្រព័ន្ធរបស់យើងដើម្បីផ្សព្វផ្សាយវិទ្យាស្ថានរបស់យើង និងជូនដំណឹងដល់ភ្ញៀវទេសចរអំពីទីកន្លែងរបស់យើង»។

លោកបានបន្តថា៖ «យើងត្រូវតែមានសេវាដែលអាចកក់សំបុត្រ ការកក់សំបុត្រតាមអនឡាញពីបរទេស។ ការទូទាត់អាចត្រូវបានធ្វើតាមរយៈកាតឥណទានពួកគេគ្រាន់តែបញ្ជូនរូបភាពរបស់ពួកគេហើយយើងអាចរៀបចំសំបុត្រសម្រាប់ពួកគេបានមិនចាំបាច់រង់ចាំនៅជួរនោះទេ»។ លោករដ្ឋមន្ដ្រីបញ្ជាក់ថានៅក្នុងប្រទេសសិង្ហបុរីពួកគេប្រើប្រាស់ប្រព័ន្ធនេះនៅក្នុងរោងភាពយន្តដែលលឿន និងងាយស្រួល។

លោកស្រី ចៅ ស៊ុនកិរិយា អ្នកនាំពាក្យអាជ្ញាធរជាតិអប្សារាបានថ្លែងថាក្រសួងសេដ្ឋកិច្ច និងហិរញ្ញវត្ថុ និងក្រសួងទេសចរណ៍មើលការខុសត្រូវលើការបង្កើតប្រព័ន្ធនេះ។ ប៉ុន្តែលោកស្រីមិនអាចផ្ដល់ព័ត៌មានលម្អិតបន្ថែមអំពីពេលណាដែលប្រព័ន្ធនេះរៀបចំរួចនោះទេដោយបញ្ជាក់ថាត្រូវការពេលវេលា។

លោកស្រីបន្តថា៖ «ប្រព័ន្ធសំបុត្រតាមអនឡាញត្រូវបានប្រើប្រាស់ជាអន្តរជាតិខ្ញុំយល់ស្របតាមគំនិតនេះ។ បើប្រទេសផ្សេងទៀតអាចធ្វើបានយើងក៏អាចធ្វើបានដូចគ្នា។ វាសន្សំពេលវេលាប៉ុន្តែយើងត្រូវតែមានប្រព័ន្ធដ៏រលូន»។

ធនាគារកណ្តាលអឺរ៉ុបនឹងប្រកាសវិធានការជំរុញសេដ្ឋកិច្ច

ហ្វ្រេងហ្វឺតៈ ក្រុមអ្នកវិភាគថ្លែងថាធនាគារកណ្ដាលអឺរ៉ុប (ECB) នឹងប្រកាសពីវិធានការជំរុញសេដ្ឋកិច្ចដ៏ពិតប្រាកដមួយនៅក្នុងកិច្ចប្រជុំគោលនយោបាយរបស់ខ្លួននៅសប្ដាហ៍ក្រោយខណៈអតិផរណាតំបន់ចាយប្រាក់អឺរ៉ូបានត្រឡប់ទៅរកភាពអវិជ្ជមានហើយចក្ខុវិស័យសេដ្ឋកិច្ចបន្តមិនច្បាស់លាស់។

អ្នកឃ្លាំមើលធនាគារបានព្យាករថាបន្ទាប់ពីទីផ្សារហិរញ្ញវត្ថុដ៏អាប់អួលោក Mario Draghi ប្រធាន ECB នឹងប្រកាសគោលនយោបាយយ៉ាងក្លាហាននៅក្នុងកិច្ចប្រជុំពេលនេះ។

ការផ្លាស់ប្តូរទាំងនេះទំនងជានឹងដាក់បញ្ចូលការកាត់បន្ថយអត្រាការប្រាក់បន្ថែមទៀតការកើនឡើងទំហំមូលបត្របំណុលដែលធនាគារទិញរាល់ខែស្ថិតក្រោមអ្វីដែលខ្លូនហៅថាការចាក់បញ្ចូលសាច់ប្រាក់ក្នុងទីផ្សារ និងការបន្តបន្ថែមវិធានការនេះឲ្យដល់ខែមីនាឆ្នាំ ២០១៧ ។

លោក Jonathan Loynes សេដ្ឋវិទូនៅក្រុមហ៊ុន Capital Economics ថ្លែងថា៖ «ECB បានផ្ដល់សញ្ញាការបន្ធូរបន្ថយបន្ថែមទៀតនៃគោលនយោបាយរូបិយវត្ថុនៅក្នុងកិច្ចប្រជុំនៅពេលខាងមុខរបស់ខ្លួន»។

អ្នកជំនាញរូបនេះថ្លែងថា៖ «ខណៈវាស្ថិតក្រោមហានិភ័យនៅខែធ្នូការមិនពេញចិត្តផ្សេងទៀតដែលកំពុងធ្វើឲ្យខូចដល់ចក្ខុវិស័យសេដ្ឋកិច្ចគួរតែបញ្ចុះបញ្ចូលក្រុមប្រឹក្សាគ្រប់គ្រងបង្កើនពេលវេលា»។

ជាមួយនឹងការត្រឡប់មកវិញនៃអតិផរណាអវិជ្ជមាននៅក្នុងតំបន់អឺរ៉ូវាបានធ្លាក់ចុះដល់ -០,២ ភាគរយកាលពីខែកុម្ភៈជាលើកដំបូងនៅក្នុងរយៈពេល ៥ ខែហើយកំណើនតំបន់ចាយប្រាក់អឺរ៉ូមិនត្រូវបានរំពឹងថានឹងកើនឡើងនៅក្នុងពេលឆាប់ៗនេះទេដែលករណីសម្រាប់វិធានការជំរុញសេដ្ឋកិច្ចនៅពេលនេះគឺច្បាស់ណាស់នឹងត្រូវដាក់ចេញ។ នេះបើតាមលោក Holger Schmieding សេដ្ឋវិទូនៅធនាគារ Berenberg Bank។

លោកថ្លែងថា៖ «ដោយសារភាពមិនប្រាកដដែលកើនឡើងខ្ពស់អំពីសេដ្ឋកិច្ចពិភពលោកការកើនឡើងហានិភ័យនយោបាយក្នុងតំបន់អឺរ៉ុប និងការបារម្ភជាថ្មីអំពីស្ថានភាពប្រព័ន្ធធនាគារតំបន់អឺរ៉ុបការប្រែប្រួលហិរញ្ញវត្ថុទំនងជានឹងប៉ះពាល់ដល់ការផ្លាស់ប្តូរវិធានការជំរុញសេដ្ឋកិច្ចបច្ចុប្បន្នរបស់ ECB»៕ LA

អ៊ីរ៉ង់-តួកគី ចង់បង្កើនទំហំពាណិជ្ជកម្មបីដង

ក្រុងតេអេរ៉ង់ៈ ក្រុមមន្ត្រីបានឲ្យដឹងនៅទីក្រុងតេអេរ៉ង់កាលពីថ្ងៃសៅរ៍ថាប្រទេសអ៊ីរ៉ង់ និងតួកគីមានគោលបំណងបង្កើនពាណិជ្ជកម្មប្រចាំឆ្នាំរបស់ខ្លួនបីដងដល់ ៣០ ពាន់លានដុល្លារក្នុងរយៈពេលពីរឆ្នាំបើទោះជាប្រទេសទាំងពីរមានជម្លោះជាមួយគ្នាដោយសារការវាយប្រហារនៅប្រទេសស៊ីរីក្តី។

បន្ទាប់ពីកិច្ចព្រមព្រៀងនុយក្លេអ៊ែរកាលពីឆ្នាំមុនជាមួយនឹងមហាអំណាចពិភពលោកមកប្រទេសអ៊ីរ៉ង់ត្រូវបានកំណត់គោលដៅដោយសហភាពអឺរ៉ុបក្នុងនាមជាទីផ្សារថ្មីមួយតែប្រទេសតួកគីក៏កំពុងព្យាយាមទាញយកផលប្រយោជន៍ផងដែរបន្ទាប់ពីការបញ្ចប់ទណ្ឌកម្មអន្តរជាតិភាគច្រើនលើប្រទេសអ៊ីរ៉ង់។

ដោយបានធ្វើដំណើរទៅទស្សនកិច្ចនៅរដ្ឋធានីរបស់ប្រទេសអ៊ីរ៉ង់ លោក Ahmet Davutoglu នាយករដ្ឋមន្ត្រីតួកគីបានជួបប្រជុំជាមួយលោក Eshaq Jahangiri អនុប្រធានាធិបតីទីមួយរបស់ប្រទេសអ៊ីរ៉ង់។

ដោយបានលើកឡើងពីក្របខ័ណ្ឌពេលវេលា ២ ឆ្នាំសម្រាប់ការបង្កើនតួលេខពាណិជ្ជកម្មពីចំនួន ១០ ពាន់លានដុល្លារនាពេលបច្ចុប្បន្នរបស់ខ្លួនលោក Jahangiri បានឲ្យដឹងនៅក្នុងការផ្សព្វផ្សាយព័ត៌មានតាមទូរទស្សន៍រដ្ឋថា៖ «យើងបានកំណត់ទិសដៅ ៣០ ពាន់លានដុល្លារសម្រាប់ពាណិជ្ជកម្មរបស់យើង»។

ពាណិជ្ជកម្មរវាងប្រទេសតួកគី និងអ៊ីរ៉ង់បានធ្លាក់ចុះពី ១៥ ពាន់លានដុល្លារមកនៅត្រឹម ១០ ពាន់លានដុល្លារក្នុងរយៈពេល ១២ ខែចុងក្រោយនេះដោយសារការនាំចេញតិចទៅកាន់ប្រទេសអ៊ីរ៉ង់។

ប្រទេសអ៊ីរ៉ង់លក់ឧស្ម័នឲ្យប្រទេសតួកគីហើយកំណើននាំចេញគឺជាប្រធានបទមួយក្នុងចំណោមប្រធានបទដែលគប្បីលើកយកមកពិភាក្សានៅអំឡុងដំណើរទស្សនកិច្ចរបស់លោក Davutoglu នេះ។

ទិសដៅពាណិជ្ជកម្មនេះបានកំណត់បន្ទាប់ពីភាពតានតឹងបានកើនឡើងរវាងប្រទេសតួកគី និងអ៊ីរ៉ង់ជុំវិញសង្គ្រាមនៅប្រទេសស៊ីរីបន្ទាប់ពីរដ្ឋាភិបាលអង់ការ៉ាបានបាញ់ទម្លាក់យន្តហោះចម្បាំងរបស់រុស្ស៊ីកាលពីឆ្នាំមុន។

ប្រទេសរុស្ស៊ី និងអ៊ីរ៉ង់បានគាំទ្រលោក Bashar al-Assad ប្រធានាធិបតីស៊ីរីរីឯតួកគីចង់ឲ្យលោក al-Assad ចុះចេញពីតំណែងហើយគាំទ្រការប្រឆាំងរបស់ក្រុមឧទ្ទាមដើម្បីផ្តួលរំលំរបប Damascus៕ BP

Nok Air និយាយសម្រាលបញ្ហាលុបជើងហោះហើរ

ក្រុងបាងកកៈ ក្រុមហ៊ុនអាកាសចរណ៍ Nok Air ដែលបានប្រឈមនឹងបញ្ហាបាននិយាយសម្រាលបញ្ហានៃការលុបចោលជើងហោះហើរចំនួន ៦១ ជើងក្នុងចំណោមជើងហោះហើររបស់ខ្លួនដោយបានលើកឡើងថាការសម្រេចរៀបចំកាលវិភាគជើងហោះហើរឡើងវិញនេះបានធ្វើឡើងតាំងពីមុនការតវ៉ារបស់អាកាសយានិកកាលពីថ្ងៃទី ១៤ ខែកុម្ភៈមកម្ល៉េះ។

ការប្រកាសពីការលុបចោលជើងហោះហើរត្រូវបានបង្ហាញនៅលើគេហទំព័ររបស់អាកាសយានដ្ឋានដនមឿង និងបានជំរុញឲ្យមានក្តីបារម្ភជាថ្មីចំពោះប្រតិបត្តិការរបស់ក្រុមហ៊ុនអាកាសចរណ៍នេះដែលបញ្ហាចម្បងដោយសារកង្វះអាកាសយានិក។

ទោះបីជាយ៉ាងនេះក្តីលោក Patee Sarasin នាយកប្រតិបត្តិក្រុមហ៊ុន Nok Air បានបញ្ជាក់កាលពីថ្ងៃសុក្រថាការលុបចោលជើងហោះហើរនេះនឹងមិនប៉ះពាល់អ្នកដំណើរនោះទេដោយពួកគេអាចធ្វើដំណើរតាមជើងហោះហើរជួលយន្តហោះរបស់ក្រុមហ៊ុនអាកាសចរណ៍ផ្សេងទៀតដែលក្រុមហ៊ុន Nok Air កំពុងអាស្រ័យលើជើងហោះហើរទាំងនោះ។

ការធានារបស់លោក Patee ត្រូវបានបង្ហោះតាមអនឡាញបន្ទាប់ពីលោកទទួលបានដំណឹងពីការលុបចោលជើងហោះហើរទាំងនេះដែលលោកបានបញ្ជាក់ថាវាបានកើតឡើងតាំងពីមុនពេលការបញ្ចប់ប្រតិបត្តិការកាលពីខែមុនទៅទៀតដែលបានធ្វើឲ្យអ្នកដំណើរជាង ៣ ពាន់នាក់មកតាមជើងហោះហើរចំនួន ១៧ ជើងជាប់គាំង។

ក្រុមហ៊ុននេះបានឲ្យដឹងនៅលើគេហទំព័រសង្គមផ្លូវការ Tweeter របស់ខ្លួនថា៖ «ពុំមានការប្រកាសថ្មីស្តីពីជើងហោះហើរដែលត្រូវបានលុបចោលទេ»។

ក្រុមហ៊ុន Nok Air បានបន្តឲ្យដឹងថា៖ «យើងកំពុងអនុវត្តតាមផែនការរបស់យើងដែលបានប្រកាសនាពេលកន្លងមកហើយរំពឹងថាបញ្ហាគ្រប់យ៉ាងនឹងវិលត្រឡប់មករកស្ថានភាពប្រក្រតីវិញនៅក្នុងពេលឆាប់ៗនេះ»។

កាលវិភាគជើងហោះហើរក្រុមហ៊ុនអាកាសចរណ៍ Nok Air ហោះហើររវាងអាកាសយានដ្ឋានដនមឿងនៅខាងជើងទីក្រុងបាងកក និងអាកាសយានដ្ឋានធំៗផ្សេងទៀតដោយមានជើងហោះហើរក្នុងប្រទេស ២៧ ជើង និងជើងហោះហើរទៅក្រៅប្រទេស ៣៤ ជើង។

ប្រភពពីអាកាសយានដ្ឋានដនមឿងចាត់ទុកថាបញ្ហានេះជាការលុបចោលជើងហោះហើរធម្មតាមួយ៕ BP

ឱនភាពពាណិជ្ជកម្មអាមេរិកកើនឡើង

ក្រុងវ៉ាស៊ីនតោនៈ ឱនភាពពាណិជ្ជកម្មអាមេរិកបានកើនឡើងខ្ពស់ជាងការរំពឹងទុកកាលពីខែមករាដោយសារការនាំចេញធ្លាក់ចុះខ្លាំងជាការធ្លាក់ចុះផ្នែកនាំចូលនៅពេលសេដ្ឋកិច្ចពិភពលោកកំពុងថយចុះ។ នេះបើយោងតាមទិន្នន័យរបស់ក្រសួងពាណិជ្ជកម្មរបស់អាមេរិកដែលបានចេញផ្សាយកាលពីចុងសប្តាហ៍មុន។

ឱនភាពពាណិជ្ជកម្មបានកើនឡើង ២,២ ភាគរយដល់ ៤៥,៧ ពាន់លានដុល្លារកាលពីខែមករាដែលជាឱនភាពខ្ពស់បំផុតក្នុងរយៈពេល ៥ ឆ្នាំ និងខ្ពស់ជាងការព្យាកររបស់អ្នកវិភាគដែលថាមានត្រឹមតែ ៤៤ ពាន់លានដុល្លារ។

ការនាំចេញ និងនាំចូលរបស់អាមេរិកបានធ្លាក់ចុះមកនៅត្រឹមកម្រិតទាបបំផុតក្នុងរយៈពេល ៥ ឆ្នាំដោយបានឆ្លុះបញ្ចាំងពីស្ថានភាពសេដ្ឋកិច្ចពិភពលោកមិនសូវល្អ និងការធ្លាក់ចុះតម្លៃប្រេង និងកំណើនថ្លៃប្រាក់ដុល្លារ។

ការនាំចេញទំនិញ និងសេវាកម្មបានធ្លាក់ចុះ ២,១ ភាគរយមកនៅត្រឹម ១៧៦,៥ ពាន់លានដុល្លារដែលជាកម្រិតទាបបំផុតគិតចាប់តាំងពីខែមិថុនា ឆ្នាំ ២០១១ ។

ការនាំចូលបានធ្លាក់ចុះ ១,៣ ភាគរយមកនៅត្រឹម ២២២,១ ពាន់លានដុល្លារដែលជាកម្រិតទាបបំផុតគិតចាប់តាំងពីខែមេសា ឆ្នាំ ២០១១ មក។

ឱនភាពពាណិជ្ជកម្មនៅខែធ្នូត្រូវបានវាយតម្លៃដំឡើងពី ៤៣,៤ ពាន់លានដុល្លារ ដល់ ៤៤,៧ ពាន់លានដុល្លារ។

លោកស្រី Emily Mandel បម្រើការនៅក្រុមហ៊ុន Moo-dy's Analytics បានមានប្រសាសន៍ថា៖ «កំណើនថ្លៃប្រាក់ដុល្លារកំពុងធ្វើឲ្យប៉ះពាល់ខ្លាំងដល់ក្រុមហ៊ុននាំចេញដោយបានធ្វើឲ្យទំនិញរបស់អាមេរិកមិនសូវមានលទ្ធភាពប្រកួតប្រជែងនៅទីផ្សារអន្តរជាតិ។ កំណើនសេដ្ឋកិច្ចសកលមិនសូវល្អក៏កំពុងធ្វើឲ្យប៉ះពាល់តម្រូវការទំនិញរបស់អាមេរិកផងដែរ»។

វាគឺជាការកើនឡើងផ្នែកឱនភាពពាណិជ្ជកម្មរយៈពេលពីរខែជាប់គ្នាហើយដោយបង្ហាញពីការធ្លាក់ចុះកំណើនសេដ្ឋកិច្ចសកលដែលភាគច្រើនបង្កឡើងដោយសារការធ្លាក់ចុះសេដ្ឋកិច្ចនៅចិន។

លោក Jim O'Sullivan ប្រធានសេដ្ឋវិទូអាមេរិកប្រចាំក្រុមហ៊ុន High Frequency Economics បានឲ្យដឹងថាបើកម្រិតឱនភាពនៅខែមករានឹងកើតមានឡើងទៀតនោះការនាំចេញកាន់តែទាបអាចកាត់បន្ថយកំណើនសេដ្ឋកិច្ចប្រមាណ ០,០៥ ភាគរយនៅត្រីមាសទីមួយ។

ដោយលើកឡើងពីរបាយការណ៍ការងារក្នុងខែកុម្ភៈរបស់ក្រសួងការងារដែលបានចេញផ្សាយកាលពីថ្ងៃសុក្រសប្តាហ៍មុនលោក O'Sullivan បានបន្តថា៖ «ពិតហើយបើទោះទាញទម្លាក់ពាណិជ្ជកម្មក្តីក៏កំណើនទូទៅនៅតែមានកម្រិតខ្ពស់ល្មមដើម្បីជំរុញស្ថានភាពប្រសើរឡើងនៅទីផ្សារពលកម្មបន្តទៀត»។

កំណើនការងារចំនួន ២៤២ ០០០ ត្រូវបានបង្កើតឡើងដោយមានកម្រិតខ្ពស់ជាងការរំពឹងទុកហើយអត្រាគ្មានការងារធ្វើមានកម្រិត ៤,៩ ភាគរយពោលគឺមានកម្រិតទាបបំផុតក្នុងរយៈពេល ៨ ឆ្នាំដែលបង្ហាញថានិយោជកបានប្រយុទ្ធប្រឆាំងនឹងការធ្លាក់ចុះកំណើនសេដ្ឋកិច្ចសកលខណៈការចំណាយអតិថិជនបានកើនឡើងជាបណ្តើរៗយ៉ាងហោចណាស់នៅពេល បច្ចុប្បន្ន។ កំណើនសេដ្ឋកិច្ចអាមេរិកអាចនឹងធ្លាក់ចុះក្នុងរយៈពេលប៉ុន្មានខែខាងមុខ៕ BP

ក្រុមហ៊ុន Moody's ទម្លាក់ចំណាត់ថ្នាក់ឥណទានក្រុមប្រទេសផលិតប្រេង

ក្រុងឌូបៃៈ ក្រុមហ៊ុន Moody's បានទម្លាក់ចំណាត់ថ្នាក់ឥណទានរបស់ប្រទេសអូម៉ង់ និងបារ៉ែន និងបានរក្សាចំណាត់ថ្នាក់របស់ក្រុមប្រទេសនាំចេញប្រេងនៅតំបន់ឈូងសមុទ្រពែក្សផ្សេងទៀតឲ្យស្ថិតក្រោមការពិចារណាទម្លាក់ចំណាត់ថ្នាក់ឥណទានដោយបានលើកឡើងថាតម្លៃប្រេងឆៅទាបបានធ្វើឲ្យសេដ្ឋកិច្ចរបស់ប្រទេសទាំងនោះធ្លាក់ចុះ។

ទីភ្នាក់ងារផ្តល់ចំណាត់ថ្នាក់ឥណទាននេះបានឲ្យដឹងក្នុងសេចក្តីថ្លែងការណ៍មួយកាលពីល្ងាចថ្ងៃសុក្រកន្លងទៅនេះថាការទម្លាក់ចំណាត់ថ្នាក់ឥណទាននេះបានធ្វើឡើងដើម្បីឆ្លុះបញ្ចាំងពីផលប៉ះពាល់នៃការធ្លាក់ចុះតម្លៃប្រេងខ្លាំងជាបន្ត។

ការវាយតម្លៃរបស់ក្រុមហ៊ុន Moo-dy's ត្រូវបានធ្វើចំពោះប្រទេសដែលផលិតប្រេងច្រើនជាងគេក្នុងអង្គការ OPEC គឺប្រទេសអារ៉ាប៊ី សាអ៊ូឌីត ដែលចំណាត់ថ្នាក់ឥណទានរបស់ប្រទេសនេះនៅក្នុងក្រុមហ៊ុន Standard and Poor's ត្រូវបានទម្លាក់ពីរចំណាត់ថ្នាក់មកនៅត្រឹមចំណាត់ថ្នាក់ A- កាលពីខែមុន។ ក្រៅពីនេះគឺប្រទេសអេមីរ៉ាតអារ៉ាប់រួម ប្រទេសកូវ៉ែត និងប្រទេសកាតា។

ក្រុមហ៊ុន Moody's បានព្យាករថាតម្លៃប្រេងនឹងមានតម្លៃជាមធ្យម ៣៣ ដុល្លារក្នុងមួយធុងនៅឆ្នាំ ២០១៦ និង ៣៨ ដុល្លារក្នុងមួយធុងនៅឆ្នាំក្រោយ និង ៤៨ ដុល្លារនៅឆ្នាំ ២០១៩។

ចំណាត់ថ្នាក់ឥណទានរបស់បារ៉ែនត្រូវបានទម្លាក់មួយចំណាត់ថ្នាក់មកនៅត្រឹមចំណាត់ថ្នាក់ Ba1 ពោលគឺជាចំណាត់ថ្នាក់មួយដែលមានស្ថានភាពមិនសូវល្អ និងមានហានិភ័យ។ ចំណាត់ថ្នាក់ឥណទានរបស់ប្រទេសអូម៉ង់ត្រូវបានទម្លាក់ពីរចំណាត់ថ្នាក់មកនៅត្រឹមចំណាត់ថ្នាក់ A1 ដែលស្ថិតក្នុងចំណាត់ថ្នាក់ល្អមួយដដែលដែលមានហានិភ័យឥណទានទាប។

ក្រុមហ៊ុន Moody's បានបន្តឲ្យដឹងថាបើទោះជាប្រទេសនេះជាប្រទេសបារ៉ែនជាប្រទេសនាំចេញប្រេងតូចក្តីការនាំចេញប្រេង និងឧស្ម័នមានទំហំស្មើនឹង ៧៥ ភាគរយនៃការនាំចេញរបស់ប្រទេសនេះ និងមាន ៨៦ ភាគរយនៃប្រាក់ចំណូលសាធារណៈអំឡុងឆ្នាំ ២០១០ ដល់ឆ្នាំ ២០១៤។

ទីភ្នាក់ងារផ្តល់ចំណាត់ថ្នាក់នេះបានបន្តឲ្យដឹងថាចំពោះប្រទេសអូម៉ង់វិញចំណូលប្រេង និងឧស្ម័នមានទំហំស្មើនឹង ៩០ ភាគរយនៃចំណូលរបស់រដ្ឋាភិបាល។ ប្រទេសអូម៉ង់មានមធ្យោបាយការពារទ្រព្យសម្បត្តិកាន់តែខ្សោយដោយទ្រព្យសម្បត្តិហិរញ្ញវត្ថុរបស់រដ្ឋាភិបាលស្ថិតក្នុងចំនួនមួយដែលអាចចំណាយបានតែរយៈពេលបីឆ្នាំប៉ុណ្ណោះ។

ក្រុមហ៊ុន Moody's បានឲ្យដឹងទៀតថា៖ «វិបត្តិជាលក្ខណៈរចនាសម្ព័ន្ធដែលចាប់ផ្តើមកើតឡើងនៅក្នុងផ្សារប្រេងកំពុងកាត់បន្ថយតារាងតុល្យការរបស់ក្រុមប្រទេសនៅតំបន់ឈូងសមុទ្រពែក្ស សេដ្ឋកិច្ចរបស់ប្រទេសទាំងនោះព្រមទាំងចំណាត់ថ្នាក់ឥណទានផងដែរ»។

ចំពោះប្រទេសអារ៉ាប៊ីសាអ៊ូឌីតវិញទីភ្នាក់ងារនេះបានឲ្យដឹងថាប្រេងមានទំហំស្មើនឹង ៨៤ ភាគរយនៃការនាំចេញ ៤០ ភាគរយនៃកំណើន ផ.ស.ស និង ៦២ ភាគរយនៃចំណូលរដ្ឋាភិបាលសរុប។ មុនពេលប្រេងធ្លាក់ថ្លៃការចូលរួមចំណែកប្រាក់ចំណូលដែលបានមកពីប្រេងឆៅមានទំហំស្មើនឹងប្រមាណ ៩០ ភាគរយ។

ចន្លោះឆ្នាំ ២០១៣ ដល់ឆ្នាំ ២០១៥ ប្រាក់ចំណូលគិតជាភាគរយនៃ ផ.ស.ស របស់អារ៉ាប៊ីសាអ៊ូឌីត បានធ្លាក់ចុះ ២៣ ភាគរយ៕ BP

សហភាពអឺរ៉ុប បង្កើនការដាក់ទណ្ឌកម្មប្រឆាំងកូរ៉េខាងជើង

ក្រុងប៊្រុចសែលៈ កាលពីថ្ងៃសុក្រសហភាពអឺរ៉ុបបានដាក់ទណ្ឌកម្មបន្ថែមប្រឆាំងនឹងប្រទេសកូរ៉េខាងជើងដោយសារការសាកល្បងអាវុធនុយក្លេអ៊ែរ និងគ្រាប់មីស៊ីលបាលីស្ទិកនាពេលថ្មីៗនេះដែលសាកល្បងនេះប្រឆាំងនឹងការសម្រេចរបស់អង្គការសហប្រជាជាតិ។

សហភាពដែលមានសមាជិកចំនួន ២៨ ប្រទេសនេះបានឲ្យដឹងថាខ្លួនបានដាក់បន្ថែមបុគ្គលជនជាតិកូរ៉េខាងជើងចំនួន ១៦ រូប និងអង្គភាពចំនួន ១២ ចូលក្នុងបញ្ជីខ្មៅទណ្ឌកម្មដែលក្នុងបញ្ជីនោះសរុបមានក្រុមហ៊ុន និងបុគ្គលចំនួន ៦០ រូបដែលរងផលប៉ះពាល់ដោយសារការហាមឃាត់ការធ្វើដំណើរ និងការបង្កកទ្រព្យសម្បត្តិបន្ទាប់ពីការសាកល្បងអាវុធនាពេលកន្លងមក។

កាលពីថ្ងៃពុធក្រុមប្រឹក្សាសន្តិសុខសហប្រជាជាតិបានអនុម័តទណ្ឌកម្មតឹងរ៉ឹងបំផុតប្រឆាំងនឹងរដ្ឋាភិបាលក្រុងព្យុងយ៉ាងដោយបានដាក់ការស៊ើបអង្កេតដែលមិនធ្លាប់មានពីមុនមកចំពោះទំនិញទាំងអស់ដែលចេញចូលក្នុងប្រទេសឯកាអស់រយៈពេល ៦០ ឆ្នាំមួយនេះ។

ទណ្ឌកម្មទាំងនេះក៏ហាមឃាត់ ឬរឹតបន្តឹងការនាំចេញធ្យូងថ្ម ដែក និងរ៉ែដែកព្រមទាំងសារធាតុរ៉ែផ្សេងទៀតពីប្រទេសកូរ៉េខាងជើងហើយហាមឃាត់ការផ្គត់ផ្គង់ឥន្ធនៈអាកាសចរណ៍រួមមានឥន្ធនៈសម្រាប់យានអវកាសដោយចាត់ទុកជាផ្នែកមួយនៃកិច្ចខិតខំប្រឹងប្រែងឲ្យរដ្ឋាភិបាលក្រុងព្យុងយ៉ាងបោះបង់មហិច្ឆតាអាវុធនុយក្លេអ៊ែរ និងមីស៊ីលរបស់ខ្លួន។

លោក Federica Mogherini ប្រធានផ្នែកកិច្ចការបរទេសរបស់សហភាពអឺរ៉ុបបានឲ្យដឹងកាលពីដើមសប្តាហ៍កន្លងទៅនេះថាសហភាពអឺរ៉ុបនឹងអនុវត្តឲ្យបានឆាប់រហ័សទៅតាមការដឹកនាំរបស់អង្គការសហប្រជាជាតិដោយចាត់ទុកថាសកម្មភាពរបស់ប្រទេសកូរ៉េខាងជើងគឺជាការគំរាមកំហែងធ្ងន់ធ្ងរមួយចំពោះសន្តិភាពអន្តរជាតិ និងសន្តិសុខក្នុង និងក្រៅតំបន់»៕ BP

ឥណ្ឌូនេស៊ីគ្រោងបង្កើតទីផ្សារ IPO សម្រាប់បច្ចេកវិទ្យា

ក្រុងហ្សាការតាៈ ប្រទេសឥណ្ឌូនេស៊ីមានផែនការបង្កើតទីផ្សារពិសេសមួយនៅក្នុងផ្សារហ៊ុនរបស់ខ្លួនដើម្បីធ្វើជាទីផ្សារសម្រាប់ការបោះផ្សាយលក់មូលបត្រជាសាធារណៈលើកដំបូង (IPO) របស់ក្រុមហ៊ុនដែលទើបនឹងបង្កើតថ្មី ខណៈប្រទេសមានសេដ្ឋកិច្ចធំជាងគេនៅតំបន់អាស៊ីអាគ្នេយ៍មួយនេះអនុវត្តតាមទស្សនវិស័យរបស់ខ្លួនក្នុងការក្លាយជាទីតាំងប្រចាំតំបន់សម្រាប់សហគ្រិនបច្ចេកវិទ្យា។

លោក Rudiantara រដ្ឋមន្ត្រីក្រសួងទំនាក់ទំនង និងបច្ចេកវិទ្យាព័ត៌មានរបស់ឥណ្ឌូនេស៊ីបានឲ្យដឹងថាប្រទេសនេះមានបំណងបង្កើតទីផ្សារជួញដូរថ្មីមួយដែលមានឈ្មោះជាបណ្តោះអាសន្នថា «ទីផ្សារបច្ចេកវិទ្យា» នៅផ្សារហ៊ុនឥណ្ឌូនេស៊ីដូច្នេះស្ថាបនិក និងវិនិយោគិនកាន់តែមានភាពងាយស្រួលក្នុងការធ្វើឲ្យក្រុមហ៊ុនរបស់ខ្លួនក្លាយជាក្រុមហ៊ុនសាធារណៈ។

ប្រទេសដែលមានប្រជាជនច្រើនជាងគេទីបួនក្នុងពិភពលោកមួយនេះកំពុងស្ថិតក្នុងដំណាក់កាលនៃភាពរីកចម្រើនខាងបច្ចេកវិទ្យាអនឡាញបន្ទាប់ពីមានការប្រែប្រួលសេដ្ឋកិច្ចរយៈពេលជាច្រើនឆ្នាំដែលភាពរីកចម្រើននេះត្រូវបានជំរុញដោយសារកំណើននៃការប្រើប្រាស់គ្រឿងអេឡិចត្រូនិកចល័ត និងជាប្រទេសមួយក្នុងចំណោមប្រទេសមានប្រជាជនវ័យក្មេងជាងគេក្នុងតំបន់អាស៊ី។

ក្រុមហ៊ុនពាណិជ្ជកម្មអនឡាញធំៗរាប់ចាប់ពីក្រុមហ៊ុន Tokopedia រហូតដល់ក្រុមហ៊ុន MatahariMall.com កំពុងទទួលបានផលប្រយោជន៍ពីកំណើនប្រាក់ចំណូលទន្ទឹមនឹងនោះដែរក្រុមហ៊ុនអន្តរជាតិនានាដូចជាក្រុមហ៊ុន Uber Technologies Inc ជាដើមបានបង្កើតហាងលក់ទំនិញនៅទីនោះ។

រដ្ឋមន្ត្រីរូបនេះបានបន្តឲ្យដឹងថាបច្ចុប្បន្នឥណ្ឌូនេស៊ីមើលឃើញថាក្នុងរយៈពេល ១ ឆ្នាំៗក្រុមហ៊ុនដែលទើបបង្កើតថ្មីតម្លៃរាប់ពាន់លានដុល្លារចំនួនពីរត្រូវបានបង្កើតឡើង។

លោក Rudiantara បានឲ្យដឹងបន្តថាដំណើរទស្សនកិច្ចនាពេលថ្មីៗនេះនៅតំបន់ Silicon Valley បានជំរុញរូបលោកឲ្យជំរុញបង្កើតគោលនយោបាយនានាដើម្បីបង្កើតក្រុមហ៊ុនថ្មីៗឲ្យបានរាប់ពាន់នៅឆ្នាំ ២០២០ ។

លោក Rudiantara មន្ត្រីប្រតិបត្តិនៅក្រុមហ៊ុនទូរគមនាគមន៍ធំជាងគេពីររបស់ប្រទេសឥណ្ឌូនេស៊ីមុនពេលចូលរួមជាមួយរដ្ឋាភិបាលបានប្រាប់ទីភ្នាក់ងារព័ត៌មាន Bloomberg ក្នុងសន្និសីទមួយស្តីពីមូលធនបណ្តាក់ទុនរួមគ្នានៅទីក្រុង ហ្សាការតា ថា៖ «វិនិយោគិនទាំងអស់ចង់ប្រមូលផលពីការវិនិយោគរបស់ខ្លួន។ យើងចង់ផ្តល់ជូនក្រុមហ៊ុនទាំងនោះនូវយុទ្ធសាស្រ្តច្រកចេញមួយតាមរយៈទីផ្សារមូលធនតាមរយៈការបង្កើតទីផ្សារបច្ចេកវិទ្យានេះ»។

លោកប្រធានាធិបតី Joko Widodo ដែលបានឡើងកាន់អំណាចដោយសារកម្មវិធីកំណែទម្រង់មានបំណងបង្កើតក្រុមហ៊ុនថ្មីៗប្រកបដោយថាមពល និងប្រើប្រាស់បច្ចេកវិទ្យាដើម្បីជំរុញសេដ្ឋកិច្ច។

រដ្ឋបាលលោកមានផែនការផ្តល់ភាពជាម្ចាស់កម្មសិទ្ធិរបស់ជនបរទេសទាំងស្រុងចំពោះក្រុមហ៊ុនពាណិជ្ជកម្មអនឡាញពោលគឺជាផ្នែកមួយនៃការលុបបំបាត់ឧបសគ្គក្នុងឧស្សាហកម្មមួយចំនួនដែលកន្លងមកជាកត្តារាំងស្ទះចំពោះការវិនិយោគ៕ BP

រដ្ឋាភិបាលបានលុបចោលពន្ធនាំចេញកៅស៊ូ

ភ្នំពេញៈ រដ្ឋាភិបាលបានចេញអនុក្រឹត្យមួយដើម្បីកែសម្រួលអត្រាពន្ធនាំចេញកៅស៊ូដើម្បីជួយដល់កសិករកៅស៊ូកម្ពុជាប៉ុន្តែក្រុមហ៊ុន និងអ្នកនាំចេញជាច្រើនអះអាងថាអនុក្រឹត្យនេះមិនបានជួយដល់វិស័យដែលកំពុងតែពិបាកស្រាប់នៅពេលបច្ចុប្បន្ននេះទេ។

លោកនាយករដ្ឋមន្ដ្រី ហ៊ុន សែន បានចុះហត្ថលេខាលើអនុក្រឹត្យនេះកាលពីថ្ងៃទី ៤ ខែមីនាដើម្បីកែសម្រួលពន្ធនាំចេញកៅស៊ូខណៈការធ្លាក់ចុះតម្លៃនាំឲ្យកសិករ និងក្រុមហ៊ុនខាតបង់ និងកំពុងរារាំងដល់ការដាំដុះកៅស៊ូ។

អនុក្រឹត្យចែងថាបើតម្លៃនាំចេញកៅស៊ូនៅក្រោម ១ ០០០ ដុល្លារក្នុងមួយតោនមិនតម្រូវឲ្យបង់ពន្ធនាំចេញ។ ប្រសិនបើតម្លៃកៅស៊ូចាប់ពី ១ ០០០ ដុល្លារដល់ក្រោម ២ ០០០ ដុល្លារក្នុងមួយតោនពន្ធនាំចេញគឺ ៥០ ដុល្លារក្នុងមួយតោន។

បើតម្លៃនាំចេញកៅស៊ូចាប់ពី ២ ០០០ ដុល្លារដល់ក្រោម ៣ ០០០ ដុល្លារក្នុងមួយតោនពន្ធនាំចេញគឺ ១៥០ ដុល្លារក្នុងមួយតោន។ តម្លៃនាំចេញកៅស៊ូចាប់ពី ៣ ០០០ ដុល្លារដល់ក្រោម ៤ ០០០ ដុល្លារក្នុងមួយតោនពន្ធនាំចេញគឺ ២០០ ដុល្លារក្នុងមួយតោនខណៈតម្លៃនាំចេញកៅស៊ូចាប់ពី ៤០០០ ដុល្លារក្នុងមួយតោនពន្ធគឺ ៣០០ ដុល្លារក្នុងមួយតោន។

លោក ឡេង ធីវុទ្ធ ប្រធានផ្នែកហិរញ្ញវត្ថុនៅចម្ការកៅស៊ូក្រែកឲ្យដឹងថាអនុក្រឹត្យនេះជួយដល់ផ្នែកមួយចំនួនប៉ុណ្ណោះ ។

លោកថ្លែងថា៖ «ខណៈតម្លៃទីផ្សារអន្តរជាតិនៅពេលនេះលើ ១- ០០០ ដុល្លារក្នុងមួយតោនអនុក្រឹត្យនេះមិនបានជួយច្រើនស្ថិតក្នុងស្ថានភាពបច្ចុប្បន្ននេះទេ»។

លោកបន្តថាអនុក្រឹត្យនេះស្ទើរតែគ្មានអ្វីប្លែកទេព្រោះការមិនយកពន្ធនាំចេញគឺសម្រាប់តែតម្លៃក្រោម ១០០០ ដុល្លារក្នុងមួយតោនប៉ុណ្ណោះ។

លោកថ្លែងថា៖ «នៅពេលនេះតម្លៃទីផ្សារប្រហែល ១ ០៥០ ដុល្លារក្នុងមួយតោន។ វាលើ ១០០០ ដុល្លារតិចតួចដូច្នេះយើងនៅតែត្រូវបង់ពន្ធ [៥០ ដុល្លារ]»។ ជាមួយនឹងការនាំចេញសរុបប្រហែល ៤ ០០០ តោនកាលពីឆ្នាំ ២០១៥ កើនឡើងតិចតួចបើធៀបនឹងឆ្នាំ ២០១៤ លោក ធីវុទ្ធ បន្តថាលោកមិនរំពឹងថាតម្លៃនឹងកើនឡើងនោះទេដោយសារតែទីផ្សារអន្តរជាតិធ្លាក់ចុះ និងតម្រូវការកាន់តែតិច។

លោកលើកឡើងថា៖ «វានឹងល្អបើអនុក្រឹត្យចែងថាបើតម្លៃនាំចេញក្រោម ១ ៥០០ ដុល្លារក្នុងមួយតោនមិនចាំបាច់បង់ពន្ធ»។ លោកបន្តថាទោះបីជាតម្លៃទីផ្សារបច្ចុប្បន្ននៅលើ ១០០០ ដុល្លារក្នុងមួយតោនក៏ក្រុមហ៊ុននៅតែខាតខណៈតម្លៃផលិតមានប្រហែល ១៤០០ ដុល្លារក្នុងមួយតោន»។

តំណាងក្រុមហ៊ុននាំចេញកៅស៊ូម្នាក់សុំមិនប្រាប់ឈ្មោះថ្លែងថាបើឆ្លុះបញ្ចាំងពីតម្លៃទីផ្សារបច្ចុប្បន្នអនុក្រឹត្យនេះមិនជួយបានច្រើននោះទេ។

លោកបន្តថា៖ «យើងស្នើឲ្យមានការពិភាក្សារវាងវិស័យឯកជន កសិករ ក្រុមហ៊ុន ក្រសួងកសិកម្ម ក្រសួងសេដ្ឋកិច្ច និងហិរញ្ញវត្ថុដើម្បីបើកចំហការផ្ដល់យោបល់នៅលើតុក្នុងការរកដំណោះស្រាយដែលអាចទទួលយកបាន។ នេះជាមធ្យោបាយឈ្នះឈ្នះសម្រាប់គ្រប់គ្នាប៉ុន្តែពេលនេះអនុក្រឹត្យនេះបានចេញរួចហើយ»។

លោក ម៉ក់ គឹមហុង ប្រធានសមាគមកៅស៊ូកម្ពុជាមិនអាចសុំអត្ថាធិប្បាយបានទេកាលពីម្សិលមិញដោយលោកបានថ្លែងថាលោកជាប់រវល់។

ការនាំចេញកៅស៊ូសរុបរបស់កម្ពុជាកាលពីឆ្នាំ ២០១៥ បានកើនឡើងដល់ ១៥២ ១៦០ តោនកើនឡើងពី ១៣៤ ១៥៦ តោនកាលពីឆ្នាំ ២០១៤។ នេះបើយោងតាមរបាយការណ៍នាំចេញផលិតផលកសិកម្មរបស់ក្រសួងកសិកម្មក្នុងឆ្នាំ ២០១៥ ៕ LA

កម្ពុជាស្នើឲ្យអឺរ៉ុបជួយជ្រោមជ្រែងឧស្សាហកម្មកង់

ភ្នំពេញៈ រដ្ឋាភិបាលកម្ពុជាអំពាវនាវឲ្យសហភាពអឺរ៉ុបបន្ថែមពេលវេលាលើកលែងពន្ធសម្រាប់ឧស្សាហកម្មនាំចេញកង់របស់កម្ពុជាខណៈកិច្ចព្រមព្រៀងជិតដល់ពេលត្រូវបញ្ចប់។

ថ្លែងនៅក្រៅជំនួបនៃកិច្ចប្រជុំរដ្ឋមន្ត្រីសេដ្ឋកិច្ចអាស៊ាន និងស្នងការពាណិជ្ជកម្មអឺរ៉ុប (AEM-EU) នៅទីក្រុងឈៀងម៉ៃ ប្រទេសថៃកាលពីថ្ងៃព្រហស្បតិ៍មុនលោក ស៊ុន ចាន់ថុល បានពិភាក្សាជាមួយលោកស្រី Cecilia Malmström ស្នងការពាណិជ្ជកម្ម EU ដើម្បីរកមធ្យោបាយពង្រីកពាណិជ្ជកម្មរវាងកម្ពុជា និង EU។ នេះបើតាមគេហទំព័រក្រសួងពាណិជ្ជកម្ម។

មធ្យោបាយនេះ គឺពិភាក្សាពីការឲ្យកម្ពុជាបន្តនាំចេញកង់ដែលនាំចូលគ្រឿងបង្គុំពីម៉ាឡេស៊ី ទៅ EU ដោយរួចពន្ធរយៈពេល ៣ ឆ្នាំបន្ថែមទៀត។

គម្រោងអនុគ្រោះពន្ធ GSP របស់សហភាពអឺរ៉ុបដែលផ្តល់ឲ្យកម្ពុជាចែងថាអឺរ៉ុបអនុញ្ញាតឲ្យកម្ពុជានាំចេញកង់ផលិតក្នុងស្រុក ៣០ ភាគរយដោយរួចពន្ធ។ ប៉ុន្តែដោយសារតែកម្ពុជាមិនអាចឆ្លើយតបតាមលក្ខខណ្ឌបានទើបកាលពីខែកក្កដាឆ្នាំ ២០១៤ កម្ពុជាទទួលបានកិច្ចព្រមព្រៀងរយៈពេលបីឆ្នាំក្នុងការនាំចូលគ្រឿងបង្គុំពីប្រទេសម៉ាឡេស៊ី និងសិង្ហបុរីសម្រាប់ផលិតកង់នាំចេញដែលស្ថិតក្រោមការអនុគ្រោះពន្ធនេះ។ កិច្ចព្រមព្រៀងនេះជំរុញឲ្យការនាំចេញកង់របស់កម្ពុជាទៅអឺរ៉ុបកើនឡើងខ្ពស់។

ទិន្នន័យចេញផ្សាយដោយក្រុមប្រឹក្សាតំបន់សេដ្ឋកិច្ចពិសេសកម្ពុជាបង្ហាញថាប្រទេសកម្ពុជាបាននាំចេញប្រហែល ១,៤ លានកង់ទៅសហភាពអឺរ៉ុបកាលពីឆ្នាំមុនកើនឡើង ២២ ភាគរយបើធៀបនឹងឆ្នាំ ២០១៤ ដែលមានតម្លៃ ៣៦៤ លានដុល្លារអាមេរិក។

ការលើកលែងនេះនឹងត្រូវផុតកំណត់នៅឆ្នាំ ២០១៧ ហើយរដ្ឋាភិបាលកម្ពុជាកំពុងស្វែងរកការពន្យារពេល ៣ ឆ្នាំទៀតដើម្បីការពារឧស្សាហកម្មនេះ។

លោក សែម សេរីរ័ត្ន អនុរដ្ឋលេខាធិការក្រសួងពាណិជ្ជកម្មទទួលបន្ទុកតំបន់សេដ្ឋកិច្ចពិសេសបានប្រាប់ភ្នំពេញប៉ុស្តិ៍ថាសំណើនេះមិនមែនដើម្បីនាំចូលបន្ថែមប្រទេសម៉ាឡេស៊ីនោះទេប៉ុន្តែគឺដើម្បីប្រើប្រាស់គ្រឿងបង្គំដែលនៅក្នុងស្ដុកឲ្យអស់សិន។

លោកបានថ្លែងថា៖ «រដ្ឋាភិបាលកំពុងជំរុញបញ្ហានេះជាមួយ EU ដូច្នេះក្រុមហ៊ុនអាចប្រើប្រាស់គ្រឿងបង្គុំនាំចូលដែលមានស្រាប់របស់ពួកគេ»។

លោកបន្តថា ការផលិតក្នុងស្រុកមានការពិបាកដោយសារកម្ពុជានៅតែខ្វះសមត្ថភាពក្នុងការផលិតគ្រឿងបង្គុំដើម្បីបំពេញទៅតាមលក្ខខណ្ឌ ៣០ ភាគរយរបស់អឺរ៉ុបនេះ។

លោកថ្លែងថា៖ «បើគ្មានវាទេវានឹងពិបាកខ្លាំងសម្រាប់ក្រុមហ៊ុនខណៈដែលតម្រូវការទីផ្សារទៅប្រទេសជាច្រើនដូចជាអាមេរិក និងឥណ្ឌាកើនឡើង»។

EU កាលពីខែឧសភាបានយកពន្ធ ៤៨,៥ ភាគរយលើការនាំចូលពីរោងចក្រនៅកម្ពុជាដោយចោទប្រកាន់ថាបានរំលោភលើកិច្ចព្រមព្រៀង «អ្វីៗគ្រប់យ៉ាងលើកលែងតែអាវុធ» នៅពេលពួកគេស៊ើបអង្កេតរកឃើញថាក្រុមហ៊ុនចិនបានប្រើប្រាស់កម្ពុជាជាទីផ្សារសម្រាប់នាំចេញទៅអឺរ៉ុបដោយនាំចេញកង់ផលិតនៅចិន។

ជាការឆ្លើយតបលោកស្រី Malmström EU នឹងពិចារណាលើសំណើនេះហើយនឹងបញ្ជូនត្រឡប់មកកម្ពុជានៅពេលសមរម្យមួយនាពេលអនាគត។ នេះបើតាមសេចក្តីប្រកាសនៅលើគេហទំព័រក្រសួងពាណិជ្ជកម្ម។

មិនអាចទាក់ទងតំណាងមកពី EU ប្រចាំកម្ពុជាបានទេកាលពីថ្ងៃម្សិលមិញ៕ LA

រដ្ឋមន្ត្រីហិរញ្ញវត្តុថាច្បាប់ការងាររបស់ចិនគំរាមដល់សេដ្ឋកិច្ច

ប៉េកាំងៈ រដ្ឋមន្ដ្រីក្រសួងហិរញ្ញវត្ថុចិនបានឲ្យដឹងកាលពីថ្ងៃចន្ទថាបទប្បញ្ញត្តិការងាររបស់ចិនធ្វើឲ្យប៉ះពាល់ដល់កម្មករជាច្រើនតាមរយៈការកាត់បន្ថយឱកាសការងារដោយសារទីក្រុងប៉េកាំងព្យាយាមរៀបចំរចនាសម្ព័ន្ធជាថ្មីដល់សេដ្ឋកិច្ចរបស់ខ្លួនខណៈការចៀសវាងការបញ្ឈប់ការងារបណ្ដោះអាសន្ន និងភាពចលាចលក្នុងសង្គម។

ច្បាប់កិច្ចសន្យាការងារដែលបានអនុម័តកាលពីឆ្នាំ ២០០៧ រឹតបន្តឹងក្រុមហ៊ុនក្នុងការបញ្ឈប់កម្មករពីកាងារ។ លោករដ្ឋមន្រ្ដី Lou Jiwei បានថ្លែងថាវាជាការរើសអើងចំពោះអ្នកដែលដល់ពេលធ្វើការ និងខូចប្រយោជន៍ខ្លាំងបំផុត។

ការអត្ថាធិប្បាយរបស់លោកធ្វើឡើងក្នុងជំនួបក្រៅកិច្ចប្រជុំនៃសភាជាតិប្រជាជន (NPC) ចំពេលនៃកិច្ចពិភាក្សានៅជុំវិញពិភពលោកស្ដីពីជម្លោះរវាងការបង្កើតការងារ និងការការពារកម្មករដែលមានស្រាប់។

ប្រទេសចិនកុម្មុយនីស្ដគឺធ្លាប់ជាសេដ្ឋកិច្ចបង្គាប់បញ្ជាដែលកម្មករជាច្រើននាក់អាចពឹងលើផ្នែកការងាររបស់ពួកគេសម្រាប់អ្វីៗគ្រប់យ៉ាងចាប់ពីលំនៅឋានដល់ការថែទាំសុខភាព។

រយៈពេល ៣ ទសវត្សរ៍កន្លងមកប្រទេសនេះបានទទួលយកគោលការណ៍ទីផ្សារដែលដាក់ឈ្មោះថា៖ «លទ្ធិសង្គមនិយមជាមួយនឹងលក្ខណពិសេសរបស់ប្រទេសចិន» ដែលកំពុងជំរុញឲ្យសេដ្ឋកិច្ចកើនឡើងខ្លាំង។ ប៉ុន្តែវិស័យមួយចំនួននៅតែធំ និងគ្មានប្រសិទ្ធភាពជាពិសេសសហគ្រាសដែលគ្រប់គ្រងដោយរដ្ឋ។

លោក Lou ថ្លែងថា៖ «គោលបំណងដើមរបស់ច្បាប់ការងារគឺដើម្បីការពារកម្មករប៉ុន្តែទីបញ្ចប់វាធ្វើឲ្យប៉ះពាល់ដល់អត្ថប្រយោជន៍របស់កម្មករមួយចំនួនហើយអាចបណ្ដាលឲ្យមានការកើនឡើងប្រាក់ឈ្នួលយ៉ាងឆាប់រហ័ស» ដែលកំពុងបង្កើនការចំណាយរបស់ក្រុមហ៊ុន និងបណ្ដាលឲ្យពួកគេផ្លាស់ប្តូរប្រតិបត្តិការទៅបរទេស។

លោកលើកឡើងថា៖ «ទីបំផុតនរណាត្រូវខូចប្រយោជន៍? នោះគឺកម្មករដែលត្រូវខូចប្រយោជន៍»។

លោកបន្តថា៖ «ឱកាសការងារត្រូវបានកាត់បន្ថយ»។ លោកមិនបានស្នើឲ្យមានការកែទម្រង់ជាក់លាក់នោះទេប៉ុន្តែលោកបញ្ជាក់ថាក្រសួងហិរញ្ញវត្ថុ «ត្រូវតែចង្អុលបង្ហាញបញ្ហាដែលខ្លួនមើលឃើញដោយសារតែវាមានផលប៉ះពាល់ដល់សេដ្ឋកិច្ចទាំងមូល»។

ការកាត់បន្ថយការផលិតលើសនៅក្នុងវិស័យឧស្សាហកម្មដូចជាដែកថែប និងធ្យូងថ្មបានក្លាយជាអាទិភាពបន្ទាន់សម្រាប់ប្រទេសចិនដោយសារតែខ្លួនស្វែងរកការផ្លាស់ប្តូរចេញពីកំណើនសេដ្ឋកិច្ចដែលនាំមុខដោយការវិនិយោគឆ្ពោះទៅរកគំរូដែលនាំមុខដោយការប្រើប្រាស់ក្នុងស្រុកវិញ។

ប៉ុន្តែការកាត់បន្ថយដូចនោះបានបង្កើនការបារម្ភអំពីការបញ្ឈប់ការងារបណ្ដោះអាសន្នយ៉ាងច្រើនប្រហាក់ប្រហែលគ្នានឹងសញ្ញានៃការបាត់បង់ការងារ ៣០ លានដែលបានជួបប្រទះកាលពីទសវត្សរ៍ ១៩៩០ នៅពេលទីក្រុងប៉េកាំងបានបិទទ្វារក្រុមហ៊ុនដែលដំណើរការដោយរដ្ឋរាប់ពាន់។

នៅក្នុងការបើកកិច្ចប្រជុំ NPC កាលពីថ្ងៃអាទិត្យដែលជាកិច្ចប្រជុំប្រចាំឆ្នាំរបស់សភាគ្រប់គ្រងដោយបក្សកុម្មុយនីស្ដរបស់ប្រទេសចិនលោក Li Keqiang នាយករដ្ឋមន្ដ្រីបានសន្យាថានឹងសម្លាប់ «សហគ្រាសដែលមិនដំណើរការ» និងកាត់បន្ថយសមត្ថភាពផលិតលើសតាមរយៈការច្របាច់បញ្ចូលគ្នា ឬការជម្រះបញ្ជី៕ LA

CBC ជួយគ្រប់គ្រងហានិភ័យនៅក្នុងវិស័យហិរញ្ញវត្ថុ

ភ្នំពេញៈ កំណើនពីរខ្ទង់នៃការផ្ដល់កម្ចីនៅក្នុងប្រទេសកម្ពុជាបានបង្កើតឲ្យមានតម្រូវការទិន្នន័យកណ្ដាលរបស់ប្រវត្តិឥណទាន។ អ្នកយកសារព័ត៌មានភ្នំពេញប៉ុស្ដិ៍ Cam McGrath បានជួបសម្ភាសន៍ជាមួយលោក លី ប៉ាស្កាល់ អគ្គនាយកការិយាល័យឥណទានកម្ពុជា (CBC) ដើម្បីពិភាក្សាពីតួនាទីរបស់ការិយាល័យឥណទាន និងរបៀបជួយដល់គ្រឹះស្ថានផ្ដល់កម្ចីក្នុងការគ្រប់គ្រងហានិភ័យ។

តើអ្វីជាតួនាទីរបស់ការិយាល័យឥណទាននេះហើយមានដំណើរការដូចម្ដេចដែរ?

ការិយាល័យឥណទាន (CBC) ត្រូវបានបង្កើតឡើងចាប់តាំងពីឆ្នាំ ២០១២ ដូច្នេះនៅពេលនេះយើងកំពុងត្រៀមខ្លួនជាស្រេចនៅក្នុងឆ្នាំទី ៥ នៃប្រតិបត្តិការរបស់យើង។ ប្រតិកម្មតបដែលយើងបានទទួលរហូតមកដល់ពេលនេះគឺថាការិយាល័យឥណទានមានសារៈសំខាន់ត្រង់ថាវាជួយក្នុងការគ្រប់គ្រងហានិភ័យនៅក្នុងវិស័យធនាគារ និងកាត់បន្ថយចំនួនកម្ចីចម្រុះនៅក្នុងទីផ្សារនេះ។

តើកម្ចីពីគ្រឹះស្ថានផ្តល់កម្ចីចម្រុះជាបញ្ហាធ្ងន់ធ្ងរនៅក្នុងប្រទេសកម្ពុជាឬទេ?

នោះច្បាស់ណាស់គឺជាការបារម្ភដែលយើងបាននឹងកំពុងឮពីទីផ្សារនេះប៉ុន្តែនៅពេលយើងសម្លឹងមើលទៅក្នុងទិន្នន័យរបស់យើងនោះគឺមិនពិតទេ។ អ្វីដែលយើងដឹងគឺថាទាក់ទងនឹងកម្ចីសកម្មនៅក្នុងឧស្សាហកម្ម MFI មានគណនីជាមធ្យម ១,២ ក្នុងបុគ្គលម្នាក់តែប៉ុណ្ណោះ។ នេះមានន័យថាគណនីចំនួនកម្ចីចម្រុះនេះមិនខ្ពស់នោះទេ។ នៅពេលយើងសម្លឹងមើលភាពស្មោះត្រង់របស់អតិថិជន អតិថិជនធនាគារប្រហែលជា ៧៩ ភាគរយប៉ុណ្ណោះដែលប្រើប្រាស់គ្រឹះស្ថានមួយ។ ចំនួននោះកាត់បន្ថយហានិភ័យកម្ចីចម្រុះបានច្រើនហើយប្រជាជនកំពុងយកកម្ចីមួយទៅសងកម្ចីផ្សេងទៀត។ ដូច្នេះវាជារឿងបន្ទាប់បន្សំ និងមិនគំរាមកំហែងដល់ឧស្សាហកម្មនេះទេ។

ដោយសារតែមានការពង្រឹងលើការត្រួតពិនិត្យឥណទានកំពុងជំរុញឲ្យអតិថិជនទៅរកអ្នកចងការប្រាក់ក្រៅប្រព័ន្ធដូចជាអង្គការមិនមែនរដ្ឋាភិបាល (NGO) ជនបទដើម្បីស្វែងរកប្រាក់សងកម្ចីដែលបានជំពាក់ធនគារ និង MFI។ តើអ្នកយល់យ៉ាងណាដែរ?

សម្រាប់ពេលនេះ CBC មិនកំពុងមើលឃើញបញ្ហានោះទេ។ យើងមិនមានទិន្នន័យអំពី NGO ជនបទនោះទេដោយសារតែវាមិនចាំបាច់សម្រាប់ពួកគេក្នុងការចូលរួមជាមួយការិយាល័យឥណទាន។ ប៉ុន្តែតាមការយល់ឃើញរបស់ខ្ញុំវាពិតជាគួរឲ្យភ្ញាក់ផ្អើលខ្លាំងព្រោះនៅពេលយើងសម្លឹងមើលកម្ចីដែល MFI ជាធម្មតាកំពុងតែផ្ដល់គឺយើងកំពុងនិយាយចំនួននៅក្រោម ៥០០ ដុល្លារអាមេរិក។ នេះជាអ្វី «ងាយស្រួល» ក្នុងការទទួលបានការយល់ដឹងឡើងវិញដែលប្រជាជននៅតាមតំបន់ជនបទជារឿយៗបញ្ជូនកូនៗរបស់ពួកគេទៅទីក្រុង និងប្រទេសផ្សេងទៀត និងអ្វីកើតឡើងគឺពួកគេបញ្ជូនប្រាក់ត្រឡប់មកឲ្យគ្រួសាររបស់ពួកគេវិញដើម្បីជួយពួកគេសងបំណុល។ ប៉ុន្តែនោះគឺជាអ្វីដែលមិនមាននរណាម្នាក់អាចមើលឃើញពិតប្រាកដដោយសារតែនៅពេលពួកគេទៅក្រៅប្រទេសពួកគេមិនត្រូវបានដាក់បញ្ចុលក្នុងទិន្នន័យរបស់យើងនោះទេ។

តើការិយាល័យឥណទាននេះគ្របដណ្ដប់លើទីផ្សារឥណទានច្រើនប៉ុនណា?

វាជាទំហំដ៏ធំមួយ។ ទាក់ទងនឹងគណនីឥណទានដ៏សកម្មយើងមានគណនី ២,៥ លានដែលរួមមាន ៦០ ម៉ឺននៅធនាគារ និង ១,៩ លាននៅ MFI។ ប៉ុន្តែប្រសិនបើយើងសម្លឹងមើលទាក់ទងនឹងកម្ចីសរុបនៅក្នុងទីផ្សារដែលមានចំនួន ១០ ពាន់លានដុល្លារអាមេរិកកាលពីឆ្នាំមុនសមាមាត្រត្រូវបានផ្លាស់ប្តូរទៅរកទីតាំងផ្សេងដែលមានន័យថា MFI បានបញ្ចេញប្រាក់ ៣ ពាន់លានដុល្លារអាមេរិកក្នុងប្រាក់ ១០ ពាន់លានដុល្លារអាមេរិក និង ៧ ពាន់លានដុល្លារអាមេរិកកំពុងចេញពីធនាគារ។ នោះមានន័យថា MFI មានចំនួនអតិថិជនសកម្មច្រើនជាងគេប៉ុន្តែចំនួនកម្ចីដែលពួកគេបានចេញគឺកាន់តែទាបបើធៀបនឹងធនាគារ។ ធនាគារមានចំនួនអតិថិជនសកម្មកាន់តែតិចប៉ុន្តែពួកគេមានចំនួនកម្ចីច្រើន។ ចំនួន ១០ ពាន់លានដុល្លារអាមេរិកគឺជាចំនួនកម្ចីពិតប្រាកដដែលធនាគារ និង MFI បានបញ្ចេញលើទីផ្សារហើយគ្រឹះស្ថាននីមួយៗត្រូវបានដាក់អមដោយរបាយការណ៍ឥណទានដូចដែលបទប្បញ្ញត្តិធនាគារកណ្ដាលចែងថាសម្រាប់កម្ចីណាមួយដែលចេញពីគ្រឹះស្ថានហិរញ្ញវត្ថុត្រូវទាមទារក្នុងការត្រួតពិនិត្យរបាយការណ៍ហិរញ្ញវត្ថុជាមុន។

តើកំណើនដ៏ធំរបស់សេវាហិរញ្ញវត្ថុជួល (financial leasing) កំពុងបង្កើនតម្រូវការសម្រាប់របាយការណ៍ឥណទានអតិថិជនឬ?

ក្រុមហ៊ុនជួលទាំងនេះមួយចំនួនមិនត្រូវបានផ្តល់អាជ្ញាប័ណ្ណដោយធនាគារកណ្ដាលនោះទេដូច្នេះតាមរយៈគោលការណ៍នេះពួកគេមិនត្រូវបានកត់ត្រាដោយ CBC នោះទេ។ ប៉ុន្តែវាមានសារៈសំខាន់ដែលគ្រឹះស្ថានទាំងនោះបន្តក្នុងការសម្លឹងមើលសមត្ថភាពកម្ចីឥណទានព្រោះនៅពេលអ្នកប្រមូលកម្ចីផ្សេងៗគ្នាដែលអ្នកចាំបាច់ត្រូវសងជារៀងរាល់ខែអ្នកគិតថា «មិនអីទេវាគ្រាន់តែ ១០ ដុល្លារអាមេរិកប៉ុណ្ណោះ»។ ប៉ុន្តែបើគិតឲ្យបានល្អិតល្អន់ជាមួយនឹងសេវានេះវាកើនឡើងលឿនណាស់។ ក្រុមហ៊ុន និងគ្រឹះស្ថានជាច្រើនចាំបាច់ត្រូវជួយតាមរយៈការត្រួតពិនិត្យថាប្រជាជនមានសមត្ថភាពក្នុងការសងប្រាក់កម្ចីជារៀងរាល់ខែឬទេ ។ ប៉ុន្តែខ្ញុំគិតថាវាស្ថិតក្នុងការចាប់អារម្មណ៍របស់ក្រុមហ៊ុនក្នុងការពិនិត្យមើលថាតើមនុស្សនេះអាចសងប្រាក់បានឬអត់។